TJUOVOS 6

SEKSUÁLAVIERREDAG

​

Vuona stráffalága (2005, § 302, § 304, § 305) milta la sevsalasj ulmutjahttem, sevsalasj dago, bielmmadibme ja illastibme mánáj vuollel 16 jage stráffudahtte. Buojkuldagá gåvvidi man alvos sevsalasj dagu li (Justijssa- ja gergasvuohtadepartemænnta, 2008-2009, b. 211). Sevsalasj dago ja bielmmadibme mánáj gudi li vuollel 14 jage gåhtjoduvvi råhtsåtjibmen (stráffaláhka, 2005, § 299). Stráffalága milta la råhtsatjibme ållu alvvusamos sevsalasj dahko (Justijssa- ja gergasvuohtadepartemænnta, 2008-2009, b 215-216). Dan diehti gulluji stráffalága vuolláj moadda dajs dagojs ma gulluji gássjelis ja vahágahtte sevsalasj ulmutjahttemij, ja de li vierredago. Vuonan la vierredagoj vuolemus áldar 15 jagák (stráffaláhka, 2005, § 20 a) mij merkaj máná gudi ælla dævddám 15 jage ja dahki vierredagojt ælla stráffariektá milta duobbmidahtte. Ajtu máhttá bulkke guoradallat ássjijt ma li dagádum mánás guhti le badjel 12 jage, ja bulkke la álu vuostasj ásadus mij oadtju diehtet vahágahtte sevsalasj ulmutjahttema birra mav mánná l dahkam. Dábálattjat åtsådi mánájvieson mij de máhttá vijddásap viehkev koordinierit mánnáj.

Sevsalasj unnemusáldar Vuonan la 16 jagák, mij merkaj máná gudi ælla dævddám 16 jage e besa bielmmadibmáj miededit. Danen árvustalli guoddaliddje ja duobbmoståvlå diededimijt mánájs vuollel 16 jagága avtaárvvusasjvuoda ja ludtjusasjvuoda, láddama ja kognitijva dilev åvddål stráffaássjev álgadi.