Dáv skåvllåbagádusáv la RVTS Midt dahkam Rebessa (Regionalt ressursteam om barn og unge med problematisk og skadelig seksuell atferd) siegen. Bagádusá ulmme le viehkedit máhtojt låpptit mij la varres ja dábálasj seksualitiehtta mánáj ja nuoraj gaskan aktan bagádallat gåktu giehtadallat ássjijt gånnå máná ja nuora li ulmutjahttám gássjelis ja vahágis sevsalasj láhkáj. Máhtto mánáj seksualitiehta birra máhttá binnedit riskav ahte mánná ulmutjahttegoahtá sevsalasj vahágis láhkáj. Máhtto tiemá birra viehket aj váj ájttsá illastimij ja råhtsatjimij merkaj árrat váj máhttá dåjmajt jåhtuj biedjat ja ådå råhtsatjimijt hieredit.

 

Moadda ållessjattuga soajttá e sidá lávkkit dakkár sadjáj gånnå máná jali nuora seksualitiehtta nav tjielggasit le sáhkan. Jur dan diehti li ájnas ahte fállap konkriehta vuogijt gåktu dákkir ássjijt dádjadip ja giehtadallap. Sivá mánáj ja nuoraj gássjelis ja vahágis sevsalasj ulmutjahttemij li álu viek moattebelaga ja gássjela, ja galggá suorgij rastá barggat jus ájggu buoragit giehtadallat vidjurijt.

 

Sevsalasj ulmutjahttem mij muodástuhttá jali máhttá vahágahttet máhttá moatte láhkáj gåvvidit. Álu hiehpá ulmutjahttemav jali dagov gåvvidit rájájrasstididdjen jali illastiddjen. Makkir buojkuldagá buoremusát hiehpi, le kontevsta ja ulme duogen. Dán bagádusán aneduvvi åbbålattjat buojkuldagá muodástuhtte, gássjelis ja vahágahtte sevsalasj ulmutjahttem juohkka ássjáj mij máhttá liehket ålggolin mánáj vuogas ja varres seksualitiehtaj nårmajs. Ajtu alodip diedulasjvuohtaj mij guosská makkir bágo anoduvvi váj ierit sevsalasj dagoj gaskan ma mánáj gaskan dáhpáduvvi, váj garvvá stigmatisierimav ja dåssjedis noadev sidjij gej birra le sáhka.

 

Aloduvvá bagádusáv dåjmalattjat adnet ja ájgev biedjat fáhkatjåhkanimijn árvvaladdamijda ja ájádallamij sevsalasj illastimij hieredibmáj ja giehtadallamij. Juohkka skåvlån bierri sierra njuolgadusá namáj ja guládalalmadræssaj aktisasjbarggoguojmijda. Skåvlå jådediddjen le sierralágásj åvdåsvásstádus dán åvdås.