RVTS Gaskoeh jïh Rebessa (Regijonaale vierhtiedåehkie maanaj jïh noeri bïjre geerve jïh skaaroehtihks seksuelle dåemiedimmine) leah daam skuvlebïhkedimmiem dorjeme. Bïhkedimmien ulmie lea viehkiehtidh maahtoem lutnjedh aejlies jïh iemie seksualiteeten bïjre maanaj jïh noeri luvnie, jïh bïhkedidh guktie edtja aamhtesh gïetedidh gusnie maanah jïh noerh leah geerve jallh skaaroehtihks seksuelle dåemiedimmiem vuesiehtamme. Daajroe maanaj seksualiteeten bïjre maahta sån vaahram giehpiedidh olles maanah seksuelle skaaroehtihks dåemiedimmiemöönsterh evtedh. Daajroe teeman bïjre sæjhta aaj viehkiehtidh narrahtimmievæhtah jïh daaresjimmievæhtah varke vueptiestidh guktie maahta daerpies råajvarimmiejgujmie nierhkedh jïh orre daaresjimmieh heerredidh.

​

Gellie geerve almetjh maehtieh neajhkestidh suerkien sïjse tjaangedh gusnie maanan jallh noeren seksualiteete  lea dan joekoen stïeresne. Raaktan dan åvteste vihkele mijjieh tjïelke vuekieh faalehtibie dagkerh aamhtesh guarkedh jïh gïetedidh. Fåantoeh man åvteste maanah jïh noerh geerve jïh skaaroehtihks seksuelle dåemiedimmiem vuesiehtieh leah daamtaj joekoen gellieligke jïh jeenjesh, jïh laavenjostoe etaati dåaresth sæjhta daerpies årrodh jis edtja dam hijvenlaakan gïetedidh.

Seksuelle dåemiedimmie mestie tjoeperde jallh maahta skaarese sjïdtedh, maahta gellielaakan neebnedh. Daamtaj sjeahta dåemiedimmiem jallh dahkoem buerkiestidh goh mij akt mij lea raastendåaresth jallh narrahtihks. Mah baakoetjïerth mah bööremeslaakan sjiehtieh, leah jearohke konteksteste jïh aajkojste. Daennie bïhkedimmesne uvtemes baakoetjïerth tjoeperdihks, geerve jïh skaaroehtihks seksuelle dåemiedimmie åtnasuvvieh gaajhken bïjre mij maahta nåårmen ålkolen årrodh akten hijven jïh aejlies seksualiteetese maanaj luvnie. Mijjieh læjhkan haestebe voerkes årrodh mah baakoeh mah åtnasuvvieh juktie seksuelle dahkoeh maanaj gaskem veelelaakan tjïelkestidh, jïh guktie dah mej bïjre lea, eah edtjh stigmatiseeremem jïh ovdaerpies maajsoeh dååjredh.

Mijjieh haestebe bïhkedimmiem eadtjohkelaakan nuhtjedh jïh astedh digkiedidh jïh ussjedadtedh hööptemen jïh gïetedimmien bijjelen seksuelle narrahtimmeste faagetjåanghkojne. Fïerhte skuvle byöroe sov njoelkedassh darjodh gusnie laavenjostoeguejmiej nommh jïh gaskesadtemebïevnesh. Skuvlen ståvroe aktem sjïere dïedtem dan åvteste åtna.