MIELDDUS 6

SEKSUÁLALÁHKARIHKKUN

​

Norgga ráŋggáštuslága vuođul (2005, § 302, § 304, § 305)  lea seksuála láhtten, seksuála anašeapmi ja veagalváldit mánáid vuollel 16 jagi ráŋggáštusvuloš. Doahpagat čilgejit seksuála daguid iešguđetge duođalašvuođadásiid (Justiisa- ja gearggusvuođadepartemeanta, 2008-2009, s. 211). Seksuála dagut ja veagalváldin mii dahkko mánáid vuostá geat leat vuollel 14 jagi, adnojuvvo leat veagalváldin (ráŋggáštusláhka, 2005, § 299). Veagalváldin lea dat duođaleamos seksuála dahku ráŋggáštuslága mielde (Justiisa- ja gearggusvuođadepartemeanta, 2008-2009, s. 215-216). Máŋga dáin daguin mat gullet problemáhtalaš ja vahátlaš seksuála láhttemii gullet ráŋggáštuslága vuollái, ja definerejuvvojit leat krimináladahkun. Kriminála vuolleahki Norggas lea 15 jagi (ráŋggáštusláhka, 2005, § 20 a), dat mearkkaša ahte mánáin vuollel 15 jagi geat dahket kriminála daguid ii leat ráŋggáštusrievttálaš ovddasvástádus. Politiijat sáhttet dattege guorahallat áššiid maid mánát badjel 12 jagi leat dahkan, ja sáhttá dávjá leat vuosttaš instánsa mii oažžu dieđu das ahte mánná lea dahkan vahátlaš seksuála dagu. Gažadeapmi čađahuvvo dávjjimusat mánáidviesus, mii sáhttá koordineret viidásat veahki mánnái.

​

Norggas lea seksuála vuolleahki 16 jagi, dat mearkkaša ahte vuolggasadjin lea ahte mánát vuollel 16 jagi eai sáhte miehtat seksuála ovttastallamii. Go mánát vuollel 16 jagi váidojuvvojit de árvvoštallá áššáskuhtti ja riekteeiseváldi guovttebealatvuođa ja dássásašvuođa agis, láddamis ja kognitiiva doaimmas ovdal vejolaččat šaddá ráŋggáštusáššin.