RVTS Gaska/Midt lea ovttas Rebessain (Regionála resursajoavku mánáid ja nuoraid birra geain lea problemáhtalaš ja vahátlaš seksuála láhtten) ráhkadan dán skuvlabagadusa. Bagadusa ulbmil lea veahkehit gealboloktemii dearvvašlaš ja normála seksualitehtas mánáide ja nuoraide, ja addit veahki mo gieđahallat áššiid mas mánát ja nuorat leat čájehan problemáhtalaš dahje vahátlaš seksuála láhttema. Máhttu mánáid seksualitehtas sáhttá unnidit riskka ahte mánnái ovdánit seksuála vahátlaš láhttenminstarat. Máhttu fáttás dagaha maid ahte sáhttá árat fuomášit mearkkaid loavkašuhttimis ja illasteamis, vai sáhttá doibmiibidjat dárbbašlaš doaibmabijuid ja eastit ođđa illasteami.

​

Ollu rávisolbmot sáhttet garvvašit lahkonit ášši go máná dahje nuora seksualitehta čielgasit lea rašis dilis. Justa danne leage dehálaš ahte mii fállat konkrehta vugiid áddet ja gieđahallat dákkár áššiid. Leat dávjá hui seagáš ja máŋggadáfot sivat dasa manne mánáin ja nuorain lea problemáhtalaš ja vahátlaš seksuála láhtten, ja ahte lea dárbu etáhtaid rasttildeaddji ovttasbargui nagodit bures gieđahallat áššiid.

​

Seksuála láhttema mii vuorjašuhttá dahje mii sáhttá dagahit vahága, sáhttá máŋgga láhkai čilget. Dávjá heive gohčodit láhttema dahje dagu rádjerasttildeaddjin dahje loavkašuhttin. Guđemuš doahpagat heivejit buoremusat, leat konteavstta ja ulbmila duohken. Dán bagadusas geavahuvvojit váldonjuolggaduslažžan doahpagat vuorjašuhtti, problemáhtalaš ja vahátlaš seksuála láhtten buot áššiid birra mat sáhttet spiehkastit das mii lea norbman buori ja dearvvašlaš seksualitehttii mánáide. Mii ávžžuhat dattege ahte lea dihtomielalašvuohta sátneválljemiid dáfus vai nyansere seksuála daguid mánáid gaskkas, garvin dihte stigmatiserema ja dárbbašmeahttun nođiid sidjiide geat gullet áššái.

​

Ávžžuhuvvo geavahit bagadusa aktiivvalaččat ja várret áiggi fágačoahkkimiidda gos beassá ságaškuššat ja jitnosit jurddašit mo eastadit ja gieđahallat seksuála loavkašuhttimiid. Juohke skuvla berre ráhkadit iežas njuolggadusaid mas leat namat ja oktavuođadieđut ovttasbargoguimmiide. Skuvlla jođihangottis lea erenoamáš ovddasvástádus dása.